آچر خاصخيلي

آچر خاصخيلي: ليکڪ ۽ صحافي محمد آچر ولد پيارو خان خاصخيلي ۸ نومبر ۱۹۷۷ع تي ضلعي ٽنڊي الھيار ۾ پيدا ٿيو. ابتدائي تعليم پنھنجي ڳوٺ مان حاصل ڪئي ۽ انٽر جو امتحان ٽنڊي آدم مان پاس ڪيو. صحافت جي شروعات ۱۹۹۵ع ۾ ’سوال‘ اخبار ٽنڊي آدم جي رپورٽر طور ڪئي. ان کانپوءِ’بختور‘، ’هلال پاڪستان‘، ’مھراڻ‘، ’عوامي آواز‘ ۽ ٻين اخبارن ۾ به رپورٽر طور ڪم ڪيو. پاڻ ’مھراڻ هسٽاريڪل اينڊ ڪلچرل ويلفيئر سوسائٽي‘ ذريعي ضلعي سانگهڙ سميت سنڌ جي تاريخي ماڳن مڪانن ۽ ثقافت کي اجاگر ڪيو. سنڌ جي اهم معاملن تي مختلف اخبارن، رسالن ۽ ٽي وي چئنلن لاءِ ڪيترائي مضمون ۽ اسٽوريون لکيون. هن ضلعي سانگهڙ جي تاريخ بابت ڪيترائي علمي، ادبي ۽ ثقافتي سماجي پروگرام ڪرايا. ’مھراڻ هسٽاريڪل اينڊ ڪلچرل ويلفيئر سوسائٽي‘ پاران ٽنڊي آدم ۾ سنڌ ثقافتي ڪانفرنس جا ۶ کان وڌيڪ پروگرام ڪرايا، جڏهن ته ٽنڊي آدم جي تاريخ ۾ عورتن جي ثقافتي ڪانفرنس سميت ادبي ميلا به ڪرايا. ٽنڊي آدم پريس ڪلب جي عھديدار جي حيثيت ۾، ڪيترائي ملڪي ۽ غير ملڪي چئنل، ٽنڊي آدم جي اهم واقعن بابت ساڻس رابطو ڪري معلومات وٺندا ھئا. ۶ ڊسمبر ۲۰۲۲ع تي دل جو دورو پوڻ سبب وفات ڪئي ۽ پنھنجي اباڻي قبرستان ۾ دفن ٿيو.

داخلا ۾ استعمال ٿيل تاريخون

1977.11.08  عيسوي

ليکڪ ۽ صحافي محمد آچر ولد پيارو خان خاصخيلي ۸ نومبر ۱۹۷۷ع تي ضلعي ٽنڊي الھيار ۾ پيدا ٿيو.

صحافي - ڀاڱي جون ٻِيون داخلائون